كيف تشتري سياره من المنطقه الحره ب دبي
كيف تشتري سيارة من المنطقة الحرة دبي
١ - لازم تخلص الموافقة الاستيرادية الاول وتاخد قرارك بسيارة معينة (اكسباندر كروس ٢٤) مثلا .
لان الموافقة بتطول هذه الأيام وتغييرها هيعطلك ممكن شهر وشهرين .
٢- التواصل مع المعرض ... معظمنا اشتري من نيو اوتو ... هو الارخص وهو الوحيد اللي بيعلن أسعاره (معناها أنه بيتحدي بيها)
٣- نيو اوتو عليه زحمة شديدة ، التواصل مع مندوبين البيع فيه صعب ... ونتيجة الزحمة عندهم تناكة ورخامة وبيردو بصعوبة و ده خللي ناس كتير تشتكي منهم ... لكن بيردوا .... ببطئ لكن بيردوا .
٤- اشتري الشائع وابعد عن اي حاجة متعدلة (الكروس مثلا يقولك في نسخة الشرق الأوسط فيها فرش جلد و سخانات كراسي ... قول له شكرا .... انا عايز العربية ال٢٤ الخليجي اللي كل الناس شارياها ) ....
التعديلات تفتح باب شك وجدل كبير ، ولو عايز تعدل .... مصر فيها احسن صنايعية في المنطقة العربية كلها وبأسعار أقل وعلي عينك وما تخلليس حد يشتغلك .
٥- هتتواصل مع مندوب البيع وتطلب منه مواصفات العربية مطبوعة تراجعها بند بند ... وتتاكد أنها هي اللي انت عايزها بالظبط .
٦- استقريت اطلب عرض سعر رسمي هيبعتوهولك ... هيبقي فيه رقم حساب المعرض .
٧ - هتحول المبلغ عليهم هيسمع بعد يوم او اتنين والمندوب اللي انت ماشي معاه هيبلغك و يطلب العربية من المخازن في جبل علي .
٩- العربية بتيجي بعد اسبوع تقريبا .... اول ما بتوصل بيصورهالك فيديو ويعمل زوم علي لوحة الباب اللي فيها أن المواصفات خليجية ورقم الشاسيه .
١٠ - تاخد رقم الشاسيه وتعطيه للجناحين بتوعك ( شركة الشحن في الامارات ) و المستخلص الجمركي في مصر .
١١ - شركة الشحن هيستلم العربية من المعرض برقم الشاسيه ) و المستخلص هيعملك بيه التسجيل المسبق و يبعت لك رقم التسجيل المسبق ده تعطيه أيضا لشركة الشحن.
١٢- شركة الشحن هتاخد منك الموافقة الاستيرادية و صورة جوازك ورقم التسجيل المسبق و تشحن العربية .
١٣ - العربية بتتشحن من دبي علي كساحة كبيرة الي ميناء جدة في حوالي أسبوعين .
١٤ - بتتابع مع شركة الشحن اللي لما بتوصل العربية ميناء جدة بتعطيك مانيفست فيه اسم المركب اللي اتحملت عليها العربية و تاريخ التحميل واسمك ورقم الشاسيه ورقم بوليسة الشحن .
١٥ - التحميل بياخد يومين الي ٣ ايام والمركب بتاخد ٣ايام في البحر وتوصل السويس تتفرغ في يومين تلاتة بردو .
١٦ - بيبدأ المستخلص إجراءات التخليص بتاخد من ٥ إلي ١٠ ايام وممكن يتفق لك مع سطحة توصل لك العربية لغاية البيت .
١٧ - المستخلص بيحتاج منك توكيل بالتخليص هيعطيك صيغته بتعمله في السفارة أو( عن طريق ناجز في السعودية ويتصدق خارجية اون لاين وتبعتهوله يصدقه قنصلية سعودية )
١٨- هتحتاج توكيل لحد يرخص لك العربية في المرور ( زوجتك ... اخوك ... صاحبك ) اللي ورقها بيوصل مرور محافظتك بعد شهر تقريبا
١٩ - انا اتعاملت مع مستخلص كنوز في السويس وشركة العالمي شحن ( وكانوا كويسين ) ( دي تجربتي لا اكتر ولا اقل )
٢٠- نيو اوتو تعاملهم مش حلو والتواصل معاهم رخم جدا ، والإلحاح والزن منك مش هيوصلك معاهم لحاجة وهيوترك ... خلليك صبور وطويل البال .... لكنهم مضمونين وأمناء ولو عندهم حاجة متعدلة بيقولك أنهم همه اللي معدلينها ... ما بينصبوش عليك وان كنت بانصحك اوعي تاخد حاجة متعدلة .
٢١ - اختار المستخلص بعناية لانه ممكن يعكنن عليك .
٢٢- في وسطاء ممكن يشتريلك العربية من نيو اوتو أو غيره منهم صلاح بركات أو محمود اسماعيل و يعملك كل الخطوات السابقة وبياخد عمولة في حدود ٣ إلي ٤ آلاف درهم ... بس انت كده كده هتتابع معاه ومش هيعمل حاجة اكتر من اللي قلناها .
٢٤ - سلطان اوتو والقاضي وجاويش ... معارض مصرية وليسوا وسطاء ( فرع في الامارات وفرع في مصر ) وممكن ياخد منك بالجنيه المصري و يعملك كل ده بردو وهتاخد نفس عمولة الوسيط بالإضافة إلي الشحن والتخليص والتوصيل لمعارضهم في القاهرة
Comments
Post a Comment