ملخص بسيط عن ميتسوبيشي اكسباندر

 لزملائنا الجدد 

الميتسوبيشي اكسباندر السيارة رقم ١ في مصر فئة السبعة ركاب .

ليه ؟

عربيه هي الأوسع في فئتها وهي فئة الاتساع اساسا ...مساحات الجلوس فيها ممتازه في الأمام و الوسط وحتي الكراسي الخلفية هي الاوسع والأسهل في الدخول . شكلها مميز ووشها هجومي والاحلي  الكروس طبعا .

 موتور ياباني بتكنولوجيا خاصة بميتسوبيشي اسمها MIVEC  بتخللي عزم العربية يشتغل مع عدد لفات أقل وبدري  وأكثر كفاءة بشكل عام .....

جنزير صدر حديد  .

 سواقتها سهله عشان فيها مساحات زجاجية كتير و ده بيدي مجال رؤيه كويس جداً ومرايات جانبية كبيرة.. ثباتها ممتاز على الرغم ان عفشتها تميل للراحه و ده من مميزات عربيات ميتسوبيشي في العموم ان ثباتها كويس و كمان استهلاك البنزين فيها هايل .. يعني هي اقتصادية جداً في البنزين.. عيبها عند بعض الناس إنها موتور تنفس طبيعي مش تربو و ده بيخلي تسارع العربيه بطيئ عن التيربو لكن رغم ذلك  تسارعها مناسب ومتوافق مع غيارات الجير العادي التروس واللي هو مش cvt لان السي في تي محتاج تيربو عشان طلعته ميته فلازم له تيربو عكس الجير الاربع سرعات التروس العادي .. و اعتقد هي عربيه عائليه ولكنها في الجري ماتخوفش في السرعات العالية وانت سايقها .. في المقابل الموتور و الفتيس اعتماديين جداً جداً و تقريباً زيرو اعطال لا هتشوف أعطال في علبة بيئة زي التوسان والاسبورتاج تحتاج تبديل ولا جيرها دويل  يجتاج تبديل كلاتشات

الاكسباندر شغاله كتير مع شركات السياحه و خدمه شاقه و سفر و اعتماديه جداً و محدش بيشتكي منها ( اللهم إلا الهجوم المزيف من المنافسين وبيبان من الشكوي الجماعية المفاجئة من حاجة معينة في وقت واحد علي صفحات كتير كانهم اشتروا في يوم واحد وعربياتهم عطلت في يوم واحد .

 مشكلتها  الوحيدة من وجهة  نظري أن فيها ٢ اير باج بس و دي حاجه مش لطيف على عربيه عائليه..  وكمان كانت محتاجة شوية دلع .... زي حساسات الركن و كاميرات ٣٦٠ وشاحن وايرليس  والشاشة تكبر شوية ....لزوم الروشنة 

خاماتها الداخلية جيده و البلاستيك اللي موجود ملمسه كويس و في soft touch كتير يعني في العموم على سعرها العربيه ممتازه و زيرو أعطال.. 

تكييف اكسباندر هايل و متوزع كويس جداً على العربيه.. و هي  أفضل من التويوتا الراش اقرب منافسيها بس بمسافة كبيرة جدا لان الراش دفع خلفي فبتكون طلعتها أبطأ وفيها ضيق في مقاعد الوسط بسبب ارتفاع مكان البكاكس  ونفق الفتيس عشان ينقل الحركة من الخلف للامام ومفيش في الراش مؤشر حرارة ولكن لمبة تظهر عند ارتفاع درجة الحرارة  وشكلها رفيع من بره اوي وعفشتها ناشفة أوي وعزل الصوت ضعيف وصوت الموتور عالي داخل السيارة بسبب البكاكس الدفع الخلفي ....

غير أن في كلام أن إنتاجها وقف ... ودخلت مكانها الفيلوز ... اللي من وجهة نظري لم تضف اي جديد و مش بتبيع حتي زي  اختها الكبيرة في السعودية بلد التويوتا وسعرها اعلي ووديعتها اعلي والوكيل ما جابهاش مصر اساسا .

يتبقي الكيا كارينز وهي ايضا لم تضف اي شئ ... ووكيلها ما نزلهاش من سنين ... و مافيش غير نسختها التربو هي اللي مختلفة لكن اغلي بكتير وبردو ما لهاش اي قطع غيار وتقريبا صعب تشوفها في اي شارع مصري   والياباني اكيد معمر اكتر بكتير .

 

 الاكسباندر هي السيارة السبعة راكب الأكثر مبيعا في مصر

 واكتر عربية نزلت مبادرة بعد التوسان والاسبورتاج  ومبيعاتها داخل مصر حوالي 70% من مبيعات الفئة . 

السيارة التي تعني الاعتمادية والاقتصادية والاتساع  .